Labayru Fundazioa 1977an sortu zen, euskal hizkuntza eta kultura ikertu, sustatu eta zabaltzeko helburuarekin. Helburu horiek betetzeko, hainbat arlotan egiten du lan, hala ikerketan nola dibulgazioan: irakaskuntza, itzulpengintza, herri-ondarearen bilketa, euskararen erabilera normalizatzeko planak, etnografia, lexikografia, toponimia…

Euskal liburutegia, Euskal Biblioteka, ezinbesteko osagarria da lan horretarako, eta Euskal Herriari eta bertako hizkuntzari eta inguruko lurraldeei buruzko bibliografia- eta dokumentazio-ondare baliotsua gordetzen du: liburutegia, hemeroteka, dokumentu-artxiboa, argazki-artxiboa, ikus-entzunezko fondoa, kartelak eta bestelako dokumentazioa, hala nola liburuxkak, eranskailuak, egutegiak…

Labayru Fundazioa Bizkaiko mendebaldean hitz egiten den euskararen erreferentziazko erakundea da normalizazioari, ikerketari eta sustapenari dagokienez, corpusak bildu eta lantzeari dagokionez, erabilera-jarraibideak sustatzeari dagokionez, material didaktikoa sortzeari dagokionez eta irakaskuntzari dagokionez. Gainera, EGA titulua lortzeko zentro homologatua da. Bere egitekoetako bat zerbitzuak ematea da: alfabetatze eta euskalduntze eskolak, itzulpenak, euskararen erabilera planak. Baina, horrez gain, ikerkuntzarako zentroa ere bada, batez ere euskara, literatura, etnografia eta bibliografiarako.